Jab Se Mera Unwaan Banay Aun o Muhammad
Alfaz Ki Ek Shan Banay Aun o Muhammad
Yun Zeenat e Maidan Banay Aun O Muhammad
Ek Jism Mai 2 Jan Banay Aun o Muhammad
Maidan Mai Dono K Utarnay ka Ye Khat Hai
Lagta Hai K Ye Burrsh e Toheed Ka Qat Hai
Shabbir K Paalay Huwe Toheed K Shahkaar
Abbas Ny Hathon Se Banaye Hain Alamdar
Kiya Or Ho Dono Ki Shuja'at Ka Bhi Izhaar
Nanhiyaal Bhi Qaraar Hai, Dadhiyaal Bhi Qaraar
Maa Ko Bhi Ye Mamoo K Hee Akkas Lagay Hain
Hadd Ho Gae Bachpan Mai Hee Abbas Lagay Hain
Larnay Ko Chalay Jab Shah e Saqlain K Sibtain
Har Ang Pe Har Rang Pe Qurbaan Thay Daarain
Maidan Mai Yun Aaye Hain Zainab K Haseen Chain
Jis Tarah Thay Utray Kabhi Safeen Mai Hasnain
Maidan Mai Dono Ki Ajab Shan Bhali Hai
Hai Aun, Muhammad, To Muhammad Hee Ali Hai
Chehron Pe Jali He K Jalalat K Asar Hain
Qadmon Mai Qaza, Hath Mai Jeewan K Hunar Hain
Dil Jin k Haqeeqat Mai Wafaon K Nagar Hain
Raftar Se Lagta Hai Yehi Shams o Qamar Hain
Abbas K Shairon Sa Koi Shair Nahi Hai
Haan Aun o Muhammad Mai Kahin Zair Nahi Hai
Kousar Se Hain Sairaab Kaee Din K Piyasay
Jaffer K Ye PoTay Hain To Haider K Nawasay
Kahay Ko Larain Kis Se Larain Huq K Dilasay
Taqdeer, Qaza, Jang Ye Hain Kam Zara Se
Maa Baap Ki Nisbat Se Bhi Dono Mai Ye Khoo Hai
Haan Doodh Bhi Masoom Hai Or Paak Lahoo Hai
" TA'ARUF "
Dono Ny Kiya Dasht Mai Atay Hee Ye Elaan
Zahir Mai Hum Insaan Hain, Batin Mai Hain Quraan
Such Much Tumhain Hasil Hee Nahi Deen Ka Erfaan
Kafir Hai Jo Shabbir Se Ho Door Musalman
Jab Hum Ny Kiye Baap K Andaz Mai Hamlay
Mumkin Ho to Phr Mout Se Kehna K Wo Dam Ly
Khaliq Ny Ye Duniya Na Banaee Thi K Hum Thay
Bandon Ki Khuda Tak Na Rasaee Thi K Hum Thay
Ejaad Ki Mohtaaj Laraee Thi K Hum Thay'
Talwaar Bhi Ban Hee Na Paee Thi K Hum Thay
Dhokay Mai Na Rehna Humain Kamsin Na Samjhna
Khud Mout Ko Hum Dono Ka Hum Sin Na Samjhna
" JANG "
Ye Kehtay Huwe Dono Ny Talwar Nikali
Phir Ek Nazar Lashkar e Kuffar Pe Dalli
Jis Raah Ko Chalay, Fouj Ny Phr Mout Ki Raah Li
Khud Mout Ny Shabbir K Daman Mai Panah Li
Jibraeel Ny Awaz Di Sidrah Ki Fazza Mai
Khaiber Hee Nazar Anay Laga Karb o Bala Mai
Dar Dar K Ye Kehnay Lagay ishraar, Ye Kia Hai?
Bachpan Mai Hee Yun Bar Sar e Paikaar, Ye Kia Hai?
Har Aan Mai Har Sar Pe Hee Talwaar, Ye Kia Hai?
Ek Waqt Mai 2 Haider e Qaraar, Ye Kia Hai?
Mehsoos To Hota Hai Ye Dono Ki Adda Se
Lagta Hai K Ye Kheltay Rehtay Hain Qaza Se
Shezadon K Qadmon Mai Jabeen Raiz Qaza Thi
Talwaar Ki Tehreek Mai Khaliq Ki Raza Thi
Shabbir K Honton Pe Tabassum Tha, Dua Thi
9 Lakh Zabano Pe Yehi Ek Sada Thi
Qarraar Hain, Jarraar Hain, Jangjoo Hain Walli Hain
Maray Gaye Is Ghar Mai To Saray K Saray Hee Ali Hain.......
No comments:
Post a Comment