Ik din baray ghuroor se kehne lagi zameen
Aaya mere neseeb mein parcham Hussain(as) ka
Mahtaab ne kaha mere seenay ke daagh dekh
Hota hai aasma`n pay bhi matam Hussain(as) ka
Phir aasma`n ne hans ke kaha haysiyat na bhool
Tou auj-e-arsh-o-kursi-o-loho qalam nahi
Jab se jabeen-e-sibt-e-nabi mujh pay kham howi
Ous din se main bhi Arsh-e-Mu`alla se kam nahi
Kehne laga falak ke zara dekh ae zameen
Meri bulandiyon ki tou mohtaaj hogai
Bas aik shab ko aaye thay is simt Mustafa(saww)
Wo shab jahaan mein Shab-e-Mayraaj hogai
Chheda hai tazkira shab-e-mayraaj ka to soun
Mera khayal hai ke tery bhool barh gayee
Nalen-e-Mustafa(saww) ki qasam, munsafi to kar
Tujh se to martabay mein mery dhool barh gayee
Tou jinkay faiz se hai munawwar wo noor-e-zaad
Saaray azal ke din se mery apni had mein hain
Pehle to main khala ka urati rahi mazaq
Shams-o-qamar bhi ab mere bayto`n ki zad mein hain
Bayto`n ki tarbiyat pay buhot naaz bhi na kar
Kuch in mein hain sakhi, kayee kanjoos bhi to hain
Kehne lagi zamee`n ke sitaro`n ko bhi tou dekh
Kuch in mein naik hain, kayee manhoos bhi to hain
Ye sheher-e-kehkashaan ye mah-o-meher ke dayaar
Aa dekh to sahi mere daman mein kya nahi
Kehne lagi zameen sar-e-tasleem-e-kham baja
Sab kuch hai tere paas magar Karbala nahi
Wo din bhi thay ke jab mery wus`at ke aas paas
Rehta tha markab-e-shah-e-konain yaad kar
Itni si baat per tujhe itna ghuroor hai
Kehelay hain mery khak per Hasnain(as) yaad kar
Kar yaad tere paas hai jhoolay ke roop mein
Jibreel(as) lay kar aaye amari Hussain(as) ki
Tou bhi to yaad kar ke zamee`n per baroz-e-eid
Khatm-e-Rusul(saww) banay thay sawari Hussain(as) ki
Soun ae adooway aman-o-sukoo`n dushman-e-bashar
Tou aik bojh ban gayee nabyo`n ki jaan per
Eesa(as) ne aik umr sahay hain tere sitam
Aakhir sukoo`n mila hai ousay aasman per
Ae intezaar gaah Imam-e-Jahan na chhed
Jhooti shikan na daal munawwar jabeen per
Aanay day mere aakhiree waris ko aik baar
Eesa(as) ko phir utarna parega zameen per
Kehne laga falak ke zaba`n ko lagaam day
Pehle bhi tery zid ka sataya howa hoon main
Har soo muheet hain mery sarhad ki wus`atain
Tujh per azal ki subho se chhaya howa hoon main
Gustakhiya`n fuzool hain mere huzoor mein
Ab kiya kahoon ke tou to bara bad mizaj hai
Tou jinki khak tak bhi na ud kar pohonch sakain
Oun sarhado`n pay bhi mere abba ka raaj hai
Aakhir Falak ne jhuk ke Zamee`n ko kiya salam
Allah ray ye shaoor ye soorat jaha`n ki hai
Kis ne sikhai hain tujhe hazir jawabiyan
Kiya shajra-e-nasab hai tera tou kahan ki hai?
Kehne lagi zamee`n ke falak ji khata maaf
Ab theek hogai hai tabiyat janab ki
Kafi hai is qadar he mera shajra-e-nasab
Adna si ik kaneez hoon mein Bu-Turab(as) Ki
No comments:
Post a Comment